Fadliga Cumrada

Fadliga cumrada leedahay waxaa kamid ah dambigaada oo la dhaafo iyo in aay kaa fogeyso faqriga. Waxaa jira xadiith nabiga laga wariyay NNKH:

تابِعوا بينَ الحجِّ والعُمرةِ، فإنَّهُما ينفيانِ الفقرَ والذُّنوبَ (رواه الترميذي 810 ) 

"Is raac-raacsiiya Xajka iyo Cumrada labaduba waxay tir-tiraan faqriga iyo dambiga"

Sidoo kale waxaa jiro xadiith kale oo suubanaha laga wariyay NNKH kaas oo tilmaamaayo wanaaga ku jiro cumrada: 

حديث أَبِي هُرَيْرَةَ رَضِيَ اللَّهُ عَنْهُ: أَنَّ رَسُولَ اللَّهِ صَلَّى اللهُ عَلَيْهِ وَسَلَّمَ قَالَ: العُمْرَةُ إِلَى العُمْرَةِ كَفَّارَةٌ لِمَا بَيْنَهُمَا، وَالحَجُّ المَبْرُورُ لَيْسَ لَهُ جَزَاءٌ إِلَّا الجَنَّةُ رواه البخاري (1773)، ومسلم (1349).

"Cumradu weey tir-tirtaa dambigii la galay Ilaa Cumradii ugu dambeysay, Xajka la aqbalayna abaalmarintiisu waa Janno"

Qof xanuunsan ama dhintay cumro maloo sameen karaa?

Shuruudaha

Wakiilashada cumrada waxay leedahay 4 shuruudood oo kala ah:

• In qofka laga cumreynaayo uu ahaado muslim geeriyooday, xanuunsan oo sariir saaran, ama aan awoodin fulinta acmaasha cumrada (dhawaafka, sacyiga) sababo jiro aawadeed, sida in uu gaboobay ama cuuryaan ah.

• Qofka la wakiishay waa in uu ahaado qof muslim ah, caaqil ah, qaan-gaarna ah.

• Qofka la wakiishay waa in uu yahay qof horay uka cumreeyay naftiisa.

• Waxa qasab ku ah la wakiishaha in uu la yimaado niyada ka cumreynta qofkii wakiishay ma ahan nafsadiisa.